Na-impeach man sa Kamara si Vice President Sara Duterte, apan positibo gihapon ang PDP Laban Iligan City nga dili pa kini katapusan sa proseso ug mahimo pang mapukan ang maong reklamo sa Senado.
Matod ni Atty. Franklin M. Quijano sa maong grupo, sugod pa lamang kini sa legal nga proseso diin ipadala ang impeachment complaint ngadto sa Senado alang sa pormal nga pagdungog ug paghusay sa mga alegasyon.
Gipasabot niya nga kung mapamatud-an nga walay lig-on nga basihan ang reklamo batok sa Bise Presidente, adunay posibilidad nga ma-dismiss kini sa impeachment court.
Dugang pa sa abogado, gikondena sa ilang grupo ang mga kongresista nga wala maghatag og dakong konsiderasyon sa mandato sa katawhan nga mibutang kang VP Sara sa maong posisyon.
Nagtuo siya nga mas giuna pa ang panagbangi sa politika imbes nga tutukan ang nagkalisod nga kahimtang sa nasod ug ang problema nga giatubang sa katawhan.
