CAGAYAN DE ORO CITY-Namiligro nga mohuyang pagsamot ang kandidatura sa paksyon sa partido PDP-Laban ubos ni Atty Rogelio Garcia sa nagkaduol nga 2019 midterm elections.
Kini human ilha sa ruling sa Commission on Elections nga lehitimo nga liderato sa PDP-Laban ang grupo ni Sen Koko Pimentel batok kang Garcia.
Miingon si Pimentel nga magsilbing official candidates nila kadtong mga nagpasilong sa ilang partido nga nahatagan sa certificate of nomination itandi sa grupo ni Garcia nga nagpailang bag-ong presidente sa PDP-Laban.
Samtang gitawag ni Garcia nga walay basehan ang gipakanaug nga hukom sa Commission on Elections o Comelec sa pag-ila nga lehitimo ang grupo ni Pimentel.
Kini human naglugwa sa resolusyon ang Comelec diin nag-rekognisar nga ang PDP-Laban faction ni Pimentel ang angay ilhon ug dili ang grupo ni Garcia.
Miingon si Garcia nga dili pa angay magkatawa ang grupo ni Pimentel ilabina nga wala pa’y pinal nga hukom ang Comelec sa ubang mga kaso kabahin sa partido.
