CAGAYAN DE ORO CITY – Pagkab-ot nga mahimong Metro Cagayan de Oro ang kabahin sa nakalinya nga programa ni City Mayor Oscar Moreno kon nganong subli kining midagan pagka-gobernador sa Misamis Oriental.
Kini ang pagpasabot sa usa sa iyang kandidato pagka-board member sa unang distrito Engr Danielo Jamolin kon nganong gihingusgan ni Moreno kinsa three termer usab pagka-gobernador sa lalawigan ayha nahimong mayor sa syudad kon nganong gidala nila ang One MisOr-One CdeO team nga konsepto.
Gihimo ni Jamolin ang pahayag nunot sa ilang hingpit usab nga pagduso sa kandidatura pinaagi sa ilang abogado sa provincial office sa Comelec kagahapon sa buntag.
Bakante pa ang una ug segundo distrito pagka-kongresista apan kumpleto na ang posisyon pagka-board members nga pulos ubos sa partido PROMDI.
Samtang nakaduso na usab ang line-up sa National Unity Party o NUP nila ni 2nd District Congreswoman Juliette Uy sa ilang mga kandidatura sa Misamis Oriental alang sa 2022 elections.
Magsilbing kandidato pagka-gobernador si Cong Uy samtang subli magpapili pagka-bise gobernador si kanhi Vice Gov Joey Pelaez.
Ikaatbang ni Uy sila Gingoog City Vice Mayor Pedro Unabia ug City Mayor Oscar Moreno ug independent gubernaturial candidate Manuel Po.
Magka-kontra usab ang magsoong Vice Gov Jigjag ug Joey Pelaez ingon man si kanhi partylit representative Ariel ‘Ayi’ Hernandez alang sa pagka-bise gobernador.
Daw mag-rematch na usab sa laing higayon si Gov Bambi Emano ug kanhi Vice Gov Julio Uy apan alang sa pagka-kongresista sa segundo distrito ug dakong hagit alang kang 1st District Rep Christian Unabia sa iyang subli pagpapili ang dala nga puwersa ni Jennifer Karen Lagbas nga ubos sa team NUP.
