Adbokasiya ni Division Federated Supreme Secondary Learner Government President Gayle G. Escobido ang peer‑led tutoring sa mga tulunghaan aron matabangan ang mga tinun‑an sa pagtuon ug mapataas ang kalidad sa edukasyon.
Sa iyang interbyu sa Bombo Radyo, giingon ni Escobido nga tungod sa masubo nga EDCOM 2 PISA result nga nagpakita sa pagkunhod sa literacy ug numeracy skills sa mga magtutungha kumpara sa gilauman nga resulta sa Department of Education, gipaluyohan nila ang maong adbokasiya.
Gibutyag ni Escobido nga tumong nila nga mausab ang panlantaw sa mga estudyante sa ilang mga classmates isip dili lang kauban sa classroom apan usa ka partner sa pagtuon.
Dugang pa niya, ang peer‑led tutoring dako og tabang dili lang sa mga estudyante nga naglisod sa usa ka subject, apan nagahatag usab kini og “win‑win situation” tungod kay dili lang kini bahin sa pagtabang sa kapwa estudyante, apan usa usab kini ka pamaagi aron mabatonan ang kumpiyansa ug leadership skills sa mga magtutungha.
