CAGAYAN DE ORO CITY-Ipasaka sa kapolisan ang paghupot sa suspected shabu ug armas batok sa tulo ka suspek nga nagpatoo nga miembro sa rebeldeng New People’s Army o NPA sa piskalya ning syudad karong adlawa.
Kini human nasikop sa entrapment operation sila si Reynaldo Lomonggo;Ryan Bagas nga pulos taga- Laguindingan ug Jonalou Bughaw nga taga-Jasaan ning lalawigan sulod sa usa ka inn sa Brgy Carmen sa syudad.
Gibutyag ni C/Insp Ritchie Salva,hepe sa Carmen Police Station,nasikop nila ang mga suspek tungod sa pagpangilkil sa opisyal sa Philippine Red Cross diin gipangayua’g P20-mil cash.
Nakuhaan ang mga suspek sa 3 ka suspected sachets sa shabu,kalibre 38 nga armas,notebook sa ilang mga biktima ug ang mga salapi.
I-apas na lamang sa kapolisan ang kasong extortion robbery pagpasaka batok mga suspek kay gikan pa sa South Cotabato ang ilang gibiktima.
Samtang naglumba sa paghimakak ang mga dinakpang nagpatoo nga mga miembro sa rebeldeng New People’s Army o NPA nga sila nalambigit sa pagpangilkil.
Namahayag ang target sa entrapment operation nga si Lomonggo nga wala siya’y kalabutan sa pagpangilkil kay igo ra siya mokuha sa salapi subay sa gisugo kaniya.
Samtang,namugos usab si Bagas nga gipaanha lamang siya ni Lomonggo kuyog ang iyang live-in partner aron e-rescue kay wala na’y ikabayad sa gisak-an nga hotel.
Gani,andam kining mamatay kon ugaling kabahin siya sa sindikato nga nangilkil sa mga negosyante ilabina sa Mindanao.
Apan alang sa live-in partner ni Bagas nga si Bughaw nga nadamay lamang kini sa gihimo sa mag-uyuan.
Hinoon,giingong notebook ni Bughaw ang gisulatan ni Lomonggo ug Bagas sa mga tawo nga target sa ilang pagpangilkil pinaagi pagtawag sa celphone.
