Gipadayag ni dating National Defense Secretary Norberto Gonzales nga peligroso ug ginapainit ra ang isyu sa West Philippine Sea nga nagtulod sa mga importanteng problema sa katawhan nga malimtan.
Gipasabot sa kanhi opisyal nga naipit ang nasod sa tunga sa duha ka dagkong pwersa sa kalibotan busa kinahanglan ang mas maalamong pamaagi imbes nga magsige og pakig-away.
Bisan pa man sa pagpuna sa sitwasyon, gidayeg gihapon ni Gonzales si Defense Secretary Gilberto “Gibo” Teodoro ug gitawag kini nga pinakamaalamon ug pinakamaayong miyembro sa kabinete sa kasamtangang administrasyon.
Dugang pa ni Gonzales, haom kaayo si Teodoro nga magdumala sa depensa sa nasod tungod sa lawom nga kaalam sa balaod ug taas nga kahanas sa pagdumala.
