CAGAYAN DE ORO CITY-Gihataga’g mobo nga grado ni City Councilor Bong Lao ang serbisyo sa Cagayan de Oro Water District o COWD sa syudad.
Siya miingon nga wala siya mahimoot sa performance sa COWD hinungdan nga iyang gihataga’g singko gikan sa diyes nga grado.
Gisaway ni Lao ang luya nga serbisyo sa panubig hinungdan nga dili tanang barangay pa sa syudad ang na-serbisyohan niini ug nakabaton sa maayong serbisyo gikan sa COWD.
Gikadismaya usab ni acting COWD Gen Manager Engr Benvienido Batar Jr ang 5 nga grado nga gihatag niini sa COWD .
Si Batar miingon nga iyang gitahod ang reaksyon ni City Councilor Lao apan dili na makiangayon ang singko nga grado nga ihatag sa ilang ahensiya.
Giangkon ni Batar nga daghang pagsulay ang ilang giatubang apan naningkamot gihapon sila nga makahatag sa maayo nga serbisyo sa mga konsumante.
Samtang giawhag ni Lao ang kadagkuan sa Water District ilabina ang bag-ong administrasyon nga tarungon ang ilang serbisyo.
Matud ni Lao nga makauulaw sa dungog sa syudad nga usa ka highly ubanized city apan luya ang suplay sa tubig.
Gani, siya nagtoo nga dako’g ikatabang ang maayo nga serbisyo sa COWD sa kalambuan sa dakbayan.
