Kinahanglan magpadayon ang operasyon sa permitting offices.
Kini ang panawagan sa ekonomista nga si Ray Talimio Jr. taliwala sa pagpatuman sa 4-day work week sa pipila ka ahensya sa gobyerno.
Namugos si Talimio nga dili angay ihunong ang pagproseso sa mga business permits ug ubang dokumento tungod kay padayon ang operasyon sa private sector ug mga negosyo matag adlaw.
Gipasabot ni Talimio nga sama sa ubang government offices nga adunay skeletal force panahon sa krisis, mahimo usab kini ipatuman sa mga opisina nga nag-isyu og permits.
Giingon niya nga kon sirado ang importanteng opisina sa mga adlaw nga kinahanglan ang serbisyo, mahimong maapektohan ang mga kalihokan sa negosyo ug ekonomiya.
Busa iyang gisuportahan ang pagpadayon sa serbisyo sa permitting offices aron masiguro ang hapsay nga transaksyon sa mga negosyante bisan adunay 4-day work week nga polisiya. (co-written by James Oliver)
