CAGAYAN DE ORO CITY – Natumbok na sa kapolisan ang person of interest o POI ang kapolisan sa pagtulis sa Quality Control Appliance Center sa JR Borja-Aguinaldo Streets ning syudad.
Gibutyag ni City Director Police Colonel Henry Dampal nga ila nang gikuha ang CCTV footages sa mga silingang establisimiento aron ipaubos sa dugang pag-analisar ang personalidad nga gidudahan sa pagpanulis.
Miingon si Dampal nga may grupo na usab sila nga gikonsiderar nga mahimong konektado sa maong POI.
Natulis sa upat ka mga armadong suspek ang kapi’g 300-mil pesos nga kinitaan ug personal nga salapi gikan sa mga empleyado niini sa miaging gabii.
Samtang naalarma ang mga negosyante sa sunod-sunod nga kasong pagpanulis nga nahitabo sa syudad.
Miingon si Oro Chamber of Commerce Public Relations Officer Atty Antonio Soriano nga makigtagbo sila kang Dampal aron mapangayoan sa katin-awan kung unsay plano sa kapulisan sa pagbantay sa kahusay ug kalinaw sa dakbayan.
Giawhag ni Soriano ang mga pulis nga dili lang magpokus sa terorismo ug kaso sa droga apan hatagan usab pagtagad ang mga kaso sa pagpangawat ug pagpanulis ilabina nga nagkadool na ang kapaskuhan.
