Giyagyag ni Atty. Ephraim Cortez sa National Union of Peoples’ Lawyers o NUPL nga ahat ug hilaw pa kaayo ang gidala nga petisyon sa mga tagsuporta sa Bise Presidente ngadto sa Korte Suprema batok sa impeachment process.
Matud pa sa maong abogado, wala pa’y klarong lalis o aktuwal nga kadaot sa legal nga bahin tungod kay wala pa man nahitabo ang opisyal nga botasyon diha sa Senado.
Gidugang pa ni Cortez nga katungod gayud sa Kongreso ang pag-atiman sa maong isyu ug dili kini basta-basta mahilabtan sa labing taas nga korte subay sa Konstitusyon.
Gawas pa niana, kinahanglan pa unya nga pamatud-an sa kampo ni Bise Presidente Sara Duterte ug sa mga petitioner nga adunay dakong paglapas sa gahum ang gihimo sa Senado sa higayon nga magpadayon ang opisyal nga proseso..
