CAGAYAN DE ORO CITY, Philippines – Gikompirmar sa bag-ong gitudlo nga Prosecutor-General Richard Anthony Fadullon ang laraw sa pagpiyansa sa co-accused sa kasong pagpatay kang anhing Negros Oriental Governor Roel Degamo.
Namahayag si Prosecutor Fadullon nga lakip sa mga suspek nga nagfile sa petition for bail sila Marvin Miranda, usa sa gunmen, ang Palagiw sisters kinsa gitumbok nga pinanser ug maoy mibayad sa mga hired killers, ug daghan pang uban.
Kahindumduman nga gipatay si Degamo sulod sa iyang compound sa Pamplona, samtang nag-apud apud sa pay-outs sa benepisyaryo sa Pantawid Pamilyang Pilipino Program (4Ps).
Gitusaktusak sa bala ang lawas ni Degamo hinungdan nga wala na kini maluwas sa mga doctor dihang gidala sa
Negros Polymedic Hospital sa Sibulan.
Kuyog nga gimasaker sa unipormadong mga suspek ang siyam pa ka tawo sulod sa compound niadtong Marso 4, sa milabay’ng tuig.
Ang nakasibat ug natangtang nga kongresista nga si Arnie Teves ang pabiling gitumbok nga mastermind sa paglikidar kang Degamo, gumikan sa taas nga kasaysayan sa bangi-politika tali sa ilang mga pamilya.
