Nagpabiling pending sa Korte Suprema ang petition for certiorari ug prohibition nga gisang-at sa kampong Hakbang ng Maisug kabahin sa impeachment complaint batok kang Vice President Sara Duterte.
Matod ni Atty. Vic Rodriguez, lead convenor sa MAISUG, gihangyo lamang nila ang Korte Suprema nga mangilabot aron klaruhon ang constitutional boundaries sa maong impeachment process.
Gipasiugda usab niya nga wala kunoy tinuod ug buhing deliberasyon nga nahitabo sa Kamara sa wala pa gibotar ang articles of impeachment batok sa bise presidente.
Dugang pa niya, tulo lamang ka minuto ang gihatag sa matag kongresista aron makapangutana ug makapahayag sa ilang baruganan sa maong sensitibong isyu.
Bisan pa man nga naipadala na sa Senado ang articles of impeachment ug nakapag-convene na isip impeachment court, giingon ni Rodriguez nga mahimo gihapon mopagawas og resolusyon o desisyon ang Korte Suprema sa ilang petisyon bisan unsang orasa.
