Gibasura sa International Criminal Court (ICC) ang petisyon sa kampo ni kanhi Pangulong Rodrigo Duterte kabahin sa hurisdiksyon sa korte.
Base sa desisyon sa ICC Pre-Trial Chamber nga gipagawas, kagahapon, namugos ang korte nga aduna sila’y otoridad nga ipadayon ang kaso batok sa kanhi presidente, tungod sa lapad nga krimen nga iyang gihimo sa katawhan sa Pilipinas.
Dugang pa sa ICC nga mahimo gihapon nilang hupot ang kaso bisan pa nga sa Pilipinas nahitabo ang mga krimen. Gisalikway usab sa korte ang hangyo sa depensa nga lugwayan pa ang pagpagawas sa desisyon.
Kini nagpasabot nga magpadayon ang pag-imbestigasyon sa kaso batok sa 80-anyos nga kanhi presidente sa The Hague, Netherlands.
Mahinumduman nga nadakpan si Duterte niadtong Marso 11 tungod sa hangyo sa ICC, isip kabahin sa ilang imbestigasyon sa “war on drugs” sa panahon sa iyang pagkapresidente sa katuigang 2016 hangtud 2018. Ang confirmation of charges nga unang gitakda sa Setyembre 23, gi-uswag tungod sa hangyo sa iyang kampo.
Apan, giapil usab sa ICC Pre-Trial Chamber ang pagbasura sa hangyo sa defense team alang sa interim release sa kanhi pangulo.
