CAGAYAN DE ORO CITY-Mosang-at sa motion for reconsideration ang mga petitioner kabahin sa pagpabor sa Philippine Competition Commission o PCC sa kontrata sa Cagayan de Oro Water District o COWD ug Metro Pacific Water Consortium.
Kini human napakyas ang grupo nila ni Kag Eric Salcedo,Kag Bong Lao ug Kag Reuben Daba nga makumbinsir ang PCC aron wad-a’g bili ang water contract sa COWD ug MetroPac.
Miingon si Salcedo nga himoon nila ang tanan aron mabali ang hukom sa PCC diin nagtugot nga padayong mag-suplay sa tubig ang MetroPac bisan wala moagi sa igong public consultation sa syudad.
Samtang gikalipay sa kampo sa COWD nga nakumbinser nila ang PCC batok sa pag-nullify sa ilang kontrata sa MetroPac.
Miingon si acting COWD General Manager Engr Beinvenido Batar Jr nga mismo sa Bombo Radyo pa lamang kini nasayod nga may hukom na ang PCC pabor kanila.
Nagtoo si Batar nga tungod sa maong hukom,paspas na ang paghimo’g dugang facility development sa MetroPac aron makahatag sa daghang tubig-suplay sa dakbayan.
