(Update) CAGAYAN DE ORO CITY – Gisaluduhan sa Philippine Army ang buhis-kinabuhi nga sakripisyo sa pipila sa ilang mga sundalo nga nakig-engkuwentro sa nabiling mga sakop sa Dawlah Islamiyah-Maute Group o DI-MG sa bukirang bahin sa Brgy Kalanganan,Piagapo,Lanao del Sur.
Kini bisan kon natugaw ug naabog sa tropa sa Task Force Group Haribon ubos sa pagpangulo ni 103rd Infantry Brigade commander Col. Billy de la Rosa ang grupo ni DI-MG kumander Alias Usman nga utok sa pagsabwag sa terorismo sa pipila ka bahin sa Lanao del Sur.
Miingon si De la Rosa nga duha ka maglakahing paggukod sa 44th IB ug 8th Scout Ranger Company sa mga terorista, napatay nila ang sakop ni Usman diin narekober ang tag-usa ka M-16,M-14,rifle grenades,klase-klaseng magazines ug mga bala ingo man circuit indicator sa improvised explosive device o IED.
Apan subo usab ang tropa kay usa sa ilang mga sundalo ang napuruhan sa engkuwentro ug gilayong namatay samtang laing duha ang padayong gihatagan sa medikasyon gumikan sa mga igo nila.
Luyo niini,namahayag usab si AFP Western Mindanao Command commander Lt Gen Antonio Nafarrete nga taliwala sa nahimong sakripisyo sa pipila sa ilang mga sundalo apan wala nila kalimti ang dakong kontribusyon niini aron mapatunhay lang ang kalinaw sa lugar.
Siya miingon nga unta motahan na ang nabiling mga terorista ug mobalik sa panginabuhing normal aron dili sila mahurot sa walay hunong nga decisive military operation o DMO batok sa tanang mga kaaway sa estado.
Hisayrang ang DI-MG maoy mihulip sa grupong Maute-ISIS group nga unang napulbos sa government forces dihang mibuto ang urban warfare sulod sa Marawi City,Lanao del Sur niadtong Mayo-hangtod Oktobre 2017.
