CAGAYAN DE ORO CITY – Gimanduan ni Philippine Army commanding general Lt Gen Romeo Brawner Jr si 4th Infantry ‘Diamond’ Division commander Maj Gen Jose Maria Cuerpo nga hingpit nang tiwason ang paglumpag sa nabiling puwersa sa CPP-NPA nga giila nila nga dakong babag sa pagmintinar sa kahusay’g kalinaw sa mga rehiyon sa Caraga ug dinhi sa Northern Mindanao.
Kini human unang nakuha sa panahon ni Brawner sa pagsilbi pa niini nga commander sa 4th ID ang gikaintapan nga NPA kumander sa Mindanao nga si George Madlos alyas Ka Oris sa Bukidnon.
Nasundan pa usab kini sa panahon ni kanhi 4th ID commander Maj Gen Wilbur Mamawag diin ang anak-lalaki na usab ni Ka Oris ang napatay gihapon sa mga sundalo sa susamang probinsya.
Gihimo ni Brawner ang paghatag sa tahas dungan sa pagdawat ni Cuerpo sa bag-ong responsibilidad isip bag-ong commander sa 4th ID kay mi-retiro na sa serbisyo si Mamawag sa miaging semana.
