CAGAYAN DE ORO CITY – Gitambagan sa grupong Philippine Muslim Teacher’s College (PMTC) Institute of Iranun Studies si Pangulong Ferdinand Marcos Jr nga dili isandig sa technicality claims ang pag-angkon sa mga isla sa West Philippine Sea apan subay sa kasaysayan.
Kini ang sugyot ni PMTC Institute of Iranun Studies chairman Nasser Salih Sharief kon gusto sa Pilipinas nga mapalig-on ang posisyon niini sa isyu batok China nga migamit na sa naghinobrang puwersa.
Gibutyag sa Bombo Radyo ni Sharief nga migamit sa historical claims ang China sa ilang pag-angkon sa mga isla sa Pilipinas kay nasayod sila nga wala mosubay niini ang national government.
Siya miingon nga may igo sila nga datos aron lupigon sa Pilipinas ang pagpangangkon sa China gamit sa ilang taphaw nga basehan kay mga mismong unang Mindanaoans ang sulod-gawas sa mga giilogang teritoryo.
Pagsaysay pa niini nga nakahimo na sa pagsulod-gawas ang unang mga kaliwatang Pilipinhon sa maong bahin sa kadagatan 250 A.D pa samtang napadpad ang mga Tsino pag-abot na sa ika-12 nga siglo.
