Gibutyag ni Senate Finance Committee Chair Senator Sherwin Gatchalian nga posibleng moabot sa P300-bilyon ang pagkalugi sa gobyerno kung kuhaon ang excise tax sa produktong petrolyo sulod sa usa-ka tuig.
Sumala sa Senador nga kaniadto adunay ‘threshold’ nga awtomatikong mosuspinde sa excise tax kung moabot sa gihatag nga presyo ang lana, apan kini nga probisyon nawala sa tuig-2020.
Sa pagkakaron, ang nagpadayon nga programa mao ang “Pantawid Pasada” nga adunay kapin P2-bilyon nga pondo ug lahi kini sa isyu sa excise tax.
Gipunting ni Gatchalian nga ang pagtangtang sa excise tax dako ang epekto sa kita sa gobyerno ug mas makapabor sa mga adunay daghang sakyanan, ug miingon nga kinahanglan hinumdumon nga 4.4 porsyento ra ang economic growth sa miaging tuig nga mas ubos sa target ug nakaapekto sa revenue collections. (Phillip Ariata)
