CAGAYAN DE ORO CITY – Dili makiangayon ang gihimo sa mga tawong gamhanan ug nagkupot sa dakong impluwensiya aron hikawan sa katungod ang katawhan alang unta sa eleksyon sa kabatan-unan ug brgy ning tuiga.
Kini ang dismayadong reaksyon sa National Movement For Free Elections/NAMFREL nunot sa pagka-oktaba sa piliay ngadto na sunod tuig.
Gibutyag ni Nestor Banuag Jr,coordinator sa NAMFREL Misamis Oriental Chapter nga ang matag-lusad sa eleksyon ang basehan unta nga dako pa nga buhi ang demokrasya sa Pilipinas.
Sa pikas bahin,gikastigo usab ni kanhi Intergrated Bar of the Philippines-Misamis Oriental chapter president Atty Eddie Cuaresma ang pagsibog sa eleksyon sa brgy.
Siya miingon nga dili mabasol ang katawhan nga mawad-an sa kadasig kay nagsilbi nang ‘democracy for sale’ ang kada-piliay sa nasud.
Gibutyag ni Cuaresma nga nagkangil-ad ang kahimtang sa eleksyon ug dili kalikayan nga madumduman niya ang walay kuwartahay nga piliay kaniadto dinhi sa dakbayan.
Partikular sa panahon nila kanhi city mayors Atty Nene Pimentel Jr, Atty Reuben Canoy,Pedro Oloy Roa ug daghan pang Cagayanons.
