CAGAYAN DE ORO CITY – Nawad-an sa bilib kang Senate President Francis ‘Chiz’ Escudero ang kanhi presidente sa Intergrated Bar of the Philippines- Mismais Oriental chapter nga si veteran lawyer Eddie Cuaresma.
Kini tungod sa pagpamugos ni Escudero nga dili pa nila masugdan ang impeachment proceedings batok kang Vice Pres Sara Duterte kay lisod matigom ang 23 ka senadores kay kanila ang kamulo nang pangampanya sa re-election sa 2025 midterm polls sa nasud.
Miingon si Cuaresma nga tataw ang sugod sa batakang balaod diin nagsulti nga oras madawat ang impeachment complaint gikan sa kamarabaha,angayang gilayon nang masugdan ang proseso sa maporam nga korte.
Siya miingon nga nagpakita lang kini nga nagkawala na’y katakos ang mga senador sanglit pipila kanila kulang sa hibangkaagan kay ang uban mga artista pa.
Namugos usab kini nga dakong higayon ni VP Sara nga ma-alkontra niya ang pito ka articles of impeachment batok kaniya nga mugna sa kamarabaha.
Dumduman nga si Sara gihimua’g atraso sa liderato sa kamarabaha nga daw dili ensakto ang paggasto sa confidential funds sa Office of the Vice President ug Department of Education nga gigamit paggukod sa kalihukang insurhensiya nga mugna sa CPP-NPA.
Alang sa kamarabaha, bug-at ang pasangil nga nawaldas ang minilyong salapi nga gitugyan sa OVP ug DepEd rason nga angay daw kining palagputon sa katungdanan.
Apan bisan sa paghulagway sa kamarabaha kang VP Sara nga kurakot nga opisyal,pabiling gihulat pa ang pinal nga audit report sa buhatan sa Commission on Audit aron matud-an kon tinood o bakak ang mga pasangil batok kaniya.
Hisayrang nahimong katan-anan ang pipila ka magbabalaod nga namugos ipatug-an ang mga empleyado sa OVP ug DepEd kon kinsa ang mga tawo nga nahatagan sa maong mga pondo taliwala nga bugtong taga-COA lang ang makasulti niini tungod sa isyu sa pagsilbing ‘confidential.’
