Maayong balita para sa mga magtiayon, epektibo niadtong Abril 30 gipatuman na ang bag-ong maternity care package ubos sa PhilHealth Circular No. 2026-005, sumala ni PhilHealth Regional Vice President Delio Aseron sa iyang interbyu sa Bombo Radyo.
Gipahayag ni Aseron nga ang maong circular naglangkob sa pagtaas sa case rates alang sa mga maternal ug gynecologic services sa government ug private hospitals.
Ang benepisyo alang sa normal spontaneous delivery misaka gikan sa ₱12,000 ngadto sa ₱14,000 sa infirmaries ug primary care facilities, samtang misaka usab ngadto sa ₱29,000 sa mga ospital.Gipasabot usab nga ang cesarean section benefits nadugangan gikan sa ₱37,000 ngadto sa ₱58,000, ug adunay dugang benepisyo alang sa ubang specialized maternal procedures.
Lakip sa gi-adjust ang benepisyo alang sa endometrial biopsy ug dilatation and curettage (raspa) aron mamenosan ang aktuwal nga bayranan sa mga pasyente.
Matod ni Aseron, kabahin kini sa mas lig-on nga healthcare assistance alang sa mga inahan ug kababayen-an sa nasod.
