Maayong balita alang sa mga taga-Northern Mindanao, gipahibalo ni PhilHealth Regional Vice President Delio Aseron nga ang Yaman ng Kalusugan o YAKAP program, nga naghatag og expanded primary care benefits para sa mga miyembro sa PhilHealth, pwede na ma-avail.
Namahayag si Aseron sa Bombo Radyo nga ang matag Pilipino makapili kung asa nga Yakap Clinic magpahimulos, pribado man o gobyerno.
Kung private facility, adunay gamay nga out-of-pocket nga hangtod ₱900 sa usa ka tuig, samtang sa government health centers walay bayad.
Apil sa coverage ang basic diagnostic tests sama sa CBC, ECG, chest x-ray ug urinalysis, lakip na ang 21 ka take-home medicines.
Nadugangan usab ang PhilHealth cancer screening package nga naglakip sa breast, lung, liver ug colorectal cancer tests, uban sa 13 laboratory tests ug 6 ka cancer screening procedures.
Lakip usab ang colonoscopy, mammogram, low-dose chest CT scan ug liver ultrasound nga dako og tabang sa early detection sa sakit.
Gitataw ni Aseron nga karon adunay 223 ka Yakap clinics ug 190 ka accredited drugstores sa Northern Mindanao nga mahimong duolan sa mga benepisyaryo.
