Giila sa PHIVIDEC Industrial Authority nga usa ka dako nga hagit sa imprastraktura ang padayong pagtaas sa ihap sa mga lokal ug langyaw nga negosyo sa Misamis Oriental.
Sumala ni PHIVIDEC Administrator ug CEO Atty. Joseph Donato Bernedo, miabot na sa 68 ka mga kompanya ang kasamtangang naglihok sa maong pasilidad, diin 14 niini ang langyaw samtang ang kadaghanan mga lokal nga mamumuhunan.
Tungod niini, nanawagan ang opisyal sa lokal nga gobyerno nga sabayan ug paspasan ang pagpalambo sa mga dalan ug tulay sa palibot.
Pasidaan ni Bernedo, basin maminusan ang interes sa mga posibleng investor kon dili dayon masulbad ang kahuot sa trapiko, apan gipasalig sa pamunoan nga magpadayon ang ilang pakig-alayon aron magpabilin nga hapsay ang negosyo sa rehiyon.
