CAGAYAN DE ORO CITY-Gisugyot sa pipila ka magbabalaod sa tulo ka komitiba nga ipaubos sa preventive suspension ang pipila ka officials sa Phividec Industrial Authority sa ikaduhang pagdungog sa House committee on good govt and public accountability sa syudad.
Si Misamis Oriental 2nd District Rep.Juliette Uy miingon nga kinahanglang masuspenso si Phividec administrator Atty Franklin Quijano ug mga kauban niini tungod kay ilang gitaguan ang ilegal nga binuhatan sa Verde Soko Philippines Industrial Incorporated kalabot na sa mga basura.
Nasuta sa tulo ka komitiba nga nagpasagad ang mga opisyal sa ahensiya hinungdan nga nakasulod ang kapin 5-mil ka tonelada nga basura gikan sa South Korea padulong sa Misamis Oriental.
Samtang gisugyot usab ni Iligan City Lone District Rep Frederick Siao nga kinahanglang ipaubos sa preventive suspension si BoC collector Atty Floro Calixihan tungod kay may tulubagon siya sa pagkasulod sa mga basura sa Verde Soko.
Sumala ni Siao,gitugtan ni Calixihan nga makasulod sa Misamis Oriental ang kargamento sa Verde Soko taliwala nga kulang ang mga dokumento niini ug wala makabayad sa buhis.
.Apan gibutyag ni Misamis Occidental 2nd District Rep Henry Oaminal nga dili mahimong pahamtangan sa suspension ang mga opisyal samtang nagpadayon ang gihimong imbestigasyon sa maong kontrobersya.
