CAGAYAN DE ORO CITY- Gipakalma ni Gusa Brgy Kapitan Marlo Tabac ang ilang residente tungod sa gibati nga mga pagtoo nga adunay dili maayong tilimad-on ang pagkakaplagi sa dakong isda o oar fish kagahapon sa hapon.
Kini human nabangalan sa katawhan ang 10 ngadto 12 metros nga oar fish nga samaron ang likod sa lapyahan nga bahin sa maong brgy kagahapong adlawa.
Gikontra ni Tabac ang pagtoo sa uban nga posibleng nagdala sa dakong kalamidad ang pagpatim-aw sa isda sa lapyahan sa ilang lugar sama sa moigo nga linog.
Pag-ampo ingon man ang kanunay nga kaandam ang angayan batunan sa katawhan sa oras sa mga trahedya sama sa bagyo ug pagtay-og sa linog sa palibot.
Kini ang gihatag nga gabayan ni Philvolcs regional director Marcial Labininay tungod sa pagtoo-too sa uban nga nagdala’g kalamidad ang pagdunggo sa samaron nga oar fish sa kadagatang sakop sa Brgy Gusa sa syudad kagahapon sa hapon.
Si Labininay miingon nga wala mo-adaptar ang Philvolcs sa mga pagtoo-too itandi sa ubang kanasuran nga ila kining gihataga’g gamay’ng konsiderasyon sama sa Japan.
