CAGAYAN DE ORO CITY – Gi-alerto sa Cagayan de Oro City Police Office (COCPO) ang publiko nga adunay pagkabalda sa linya sa komunikasyon sulod sa pipila ka oras sa mismong adlaw sa kapistahan sa Itom nga Nazareno sunod semana.
Gibutyag ni Police Lt Col Evan Viñas,tigpamaba sa Cagayan de Oro City Police Office nga tungod kini sa sugyot sa city govt nga ipatuman ang communication signal jamming.
Kini aron pagsiguro nga luwas ang pagpahigayon sa pista nga dagsaon sa libuang mga deboto gikan sa nagkadaiyang bahin sa Mindanao.
Miingon si Viñas nga kontrolado usab ang pagpalupad sa aerial drones nga mo-cover sa kalihukan aron dili makompromiso ang seguridad sa traslacion sa Enero 9 sa kadlawon.
