CAGAYAN DE ORO CITY – Nakaabot na ang delegasyon sa Pilipinas aron moapil sa Ms Inter-continental 2021 pageant sa Sharm El Shiekh, Egypt.
Kini human mismo ang pambato sa Pilipinas nga garbo sa Cagayan de Oro City ug Misamis Oriental nga si Bb Pilipinas-Ms Inter-continental Cindy Obeñita ang nagkompirmar sa iyang facebook post nga luwas sila nakatugpa sa airport sa Ehipto sa 32 ka oras nga biyahe gikan sa kauluhan via Dubai.
Hinoon,wala pa makahatag sa mga nakahan-ay nga pre-pageant activities si Cindy ilabina nga lauman pa usab ang pag-abot abot sa mga kauban niining mg kandidata.
Una nang gitahas sa Bb Pilipinas kang Cindy ang pag-representar sa Pinay beauty sa pageant competition ug tinguhaon ang pagsakmit sa korona alang sa nasud.
Dumduman usab nga naghangyo si Cindy kinsa season beauty queen na dinhi sa Northern Mindanao ug magna cum laude sa iyang kursong Mass Communication sa kolehiyo nga i-ampo ang ilang tinguha nga molampos pagsakmit sa korona.
Himoon ang grand coronation night sa Oktubre 29 sa Ehipto apan kadlawon na dinhi sa nasud.
Kon molampos si Cindy,siya ang magsunod kang 2019 Ms Inter-continental Karen Gallman nga makakuha sa korona.
