Obligado ang gobyerno sa Pilipinas nga ipatuman ang warrant of arrest nga ipagawas sa International Criminal Court (ICC). Gipasabot kini sa Malakanyang nga andam silang motabang sa International Police (Interpol) kon magpagawas og warrant of arrest ang ICC batok kanila Senator Ronald Dela Rosa, Senator Bong Go ug uban pa nga nalambigit sa kasong crimes against humanity ni kanhi Presidente Rodrigo Duterte. Sumala kang Palace Press Officer Undersecretary Claire Castro, ang gobyerno mismo ang motabang sa pag-aresto sa mga tawo nga anaa sa bag-ong listahan sa korte, susama sa proseso sa pagdakop kang Duterte nga kasamtangang naka-detinir sa The Hague, Netherlands. Hisayran nga nagpagawas ang ICC og bag-ong listahan sa mga giingong “co-perpetrators” sa gilusad nga war on drugs ni Duterte samtang siya ang nangulo sa Pilipinas. (Phillip Ariata)
