CAGAYAN DE ORO CITY – Mabulukon ug engrande ang pagtak-op sa 30th Southeast Asian Games nga gihimo sa Athletics Stadium sa New Clark City,Capas,Tarlac kagabii.
Ang Pinoy frontman sa American rock band nga Journey nga si Arnel Pineda maoy nag-awit sa national anthem sa Pilipinas.
Gisundan kini sa parada sa mga atleta gikan sa ubang mga nasud sama sa gihimo sa opening ceremony niadtong Nob. 30.
Pagkahuman sa music video ni Sarah Geronimo nga ‘Who We Are’ nagpahigayon sa mini concert si Pineda uban sa K.O. Jones band diin nakig-jamming ang mga atleta.
Nalingaw usab ang mga manan-away sa 45-minutos nga drone show.
Samtang upat ka special awards ang gitunol sa Philippine Southeast Asian Games Organizing Committee o PHISGOC sa pagpangulo ni House Speaker Alan Peter Cayetano.
Si Zheng Wen sa Singapore nga nakasakmit sa 6 ka gold medals, gipasidunggan isip Best male athlete, Best female athlete si Nguyen Thi Anh Vien sa Vietnam tungod sa unom ka gold medals nga iyang nasakmit samtang gipasidunggan isip Fair Play Atlhete ang Pinoy hero surfer nga si Roger Casugay.
Gitunol usab ang overall championship award sa Pilipinas gumikan sa paghakot niini sa record-breaking nga 149 gold medals.
Sa iyang pakigpulong, gipasalamat ni Cayetano ang tanang grupo ilabina ang Bombo Radyo Philippines sa pagsilbing official media partner nga mitabang alang sa kalamposan sa bennial meet.
Gipasigarbo ni Cayetano ang giingong ‘world class quality’ nga pag-host sa Pilipinas sa SEA games.
