Mipasidan-an ni kanhi Iligan City Mayor Atty. Franklin Quijano ang posibilidad sa pagkaunlod sa nasud, tungod sa nagkagrabe nga mga problema sa ekonomiya nga giatubang karon sa Pilipinas.
Sumala ni Quijano, kung dili na makarekober ang tanang sektor nga nagdagpadagan sa ekonomiya, maglisod gayud ang nasud sa pagbangon.
Iyang gitumong ang pagkamubo sa bili sa piso, ang pagkunhod sa mga investment, ug ang pagsira ug pagbiya sa pipila ka mga negosyo sa Pilipinas.
Matod pa niya, delikado kaayo kung ang Overseas Filipino Workers o OFWs na lamang ang mahimong saligan sa ekonomiya sa nasud, ilabi na nga sila usab posibleng maapektuhan sa mga giyera ug uban pang global nga problema nga makababag sa ilang pagpanarbaho.
Alang kang Quijano, kung dili dayong maagapan ang maong kahimtangan, mahitabo ang usa ka kritikal nga sitwasyon nga iyang gihulagway sama sa usa ka bangka nga dili na makalutaw ug anaa na sa hingpit nga pagkalunod. (James Oliver)
