Paglikay sa kagubot ang nag-unang kampanya ni Presidente Ferdinand Marcos Jr., batok sa nagpadayong tensyon sa West Philippine Sea (WPS).
Gibutyag ni Geopolitical Expert Lucanus Azrael Igot nga sukad pa sa panahon ni kanhi Presidente Gloria Macapagal Arroyo hangtud sa kasamtangang administrasyon, kanunay managsama ang ilang paningkamot aron maprotektahan ang katawhan sa Pilipinas, batok sa mas lapad nga probokasyon sa China.
Nagtoo si Igot nga taman ra dinhi ang mahimo sa gobyerno kay wala may igong kapasidad ang kasundaluan aron atbangan pinaagi sa pakig-giyera ang higanteng nasud sama sa China nga nag-una sa pagpangilog sa mga isla sa WPS.
Subay sa daghang expert analysis, kung mahimong battle ground ang Pilipinas, dako ang posibilidad nga mapanas sa mapa ang nasud sa kalibutan ug magresulta sa mass casualties. Wala pay labot niini ang dakung kadaut sa ekonomiya.
