(Update) CAGAYAN DE ORO CITY – Dili na habulan sa tumang kalipay ug kasadya ang gitakdang adlaw unta sa kasal ni 1Lt AJ Dadulla ngadto sa iyang napili nga babaye nga ikakuyog sa tibuok kinabuhi nga aktibo usab nga miembro sa Philippine Air Force nga taga-Pangasinan duha ka semana sulod ning bulana.
Kini tungod sa trahedya nga gidangatan ni AJ gumikan sa tawag sa trabaho diin sila ni Major Jude Salang-oy ang kabahin sa mihatag aerial artillery support sa tropa sa Philippine Army nga milusob sa 70 ka sakop sa CPP-NPA sa bukirang bahin sa Brgy Iba,Cabanglasan,Bukidnon sa miaging Martes sa kadlawon.
Gikompirmar sa Armadong Kusog sa Nasud pinaagi sa Eastern Mindanao Command spokesperson Lt Col Salvacion Evangelista nga dungann nakit-an sa 1st Special Forces Batallion rescue and retrieval team ang patay’ng lawas ni AJ ug Salang-oy pipila ka tikang gikan sa nahagsaan sa gimaneho nila nga FA-50 fighter jet sa Kalatungan,Brgy Mirayon,Talakag,Bukidnon kaganihang buntag.
Nasubo pag-ayo ang mga pamilya,kauban sa trabaho ug mga higala sa duruha dihang nakompirmar nga wala sila maluwas taliwala sa paningkamot nga manyuber nila ang eroplano.
Nasuta nga lumad nga taga-Brgy Alae,Manolo Fortich,Bukidnon si AJ samtang si Salang-oy giingong naggikan usab dinhi sa Cagayan de Oro City.
Sa pagkakaron,gihulat sa pamilya sa AFP nga makuha ang patay’ng lawas sa mga biktima aron mahatag kini ngadto sa ilang nagbangutan nga mga kabanay.
