Malamposong miabante sa Round of 32 sa Cincinnati Open ang Pinay tennis star nga si Alexandra “Alex” Eala human mi-surrender ang iyang kaatbang nga si Elena-Gabriela Ruse tungod sa injury sa tuong tikod.
Bisan pa sa hinay nga pagsugod ug sa pag-una sa Romanian sa unang game, dali nga nakabangon ang 21-anyos nga tennis player pinaagi sa pagdaug sa sunod-sunod nga unom ka game aron makuha ang unang set sa iskor nga 6-1.
Nagpadayon ang maayong porma ni Eala sa ikaduhang set diin nakalabaw siya sa puntos nga 3-0 sa wala pa gipaundang ang dula tungod sa medical timeout ni Ruse.
Paglabay sa usa ka oras nga pagkahunong tungod sa pagpangilat, diin nag-una si Eala sa puntos nga 30-0 sa ikaupat nga game, nidesisyon si Ruse nga dili na mopadayon
. Kini naghatag og dakong tsansa sa Filipina athlete nga makabawi human sa iyang kapildihan sa Canadian Open.
