CAGAYAN DE ORO CITY-Kumbinsido ang Overseas Workers and Welfare Administration o OWWA-Northern Mindanao nga biktima sa abusong pisikal ang namatay nga Pinay domestic helper nga unang nakapuyo sa Brgy San Isidro, Valencia City, Bukidnon.
Kini human nakaangkon sa grabeng bun-og ang kalawasan ug bu-ak ang ulo sa biktima nga si Leizel Trus Hukdong, 33 anyos, bulag sa bana ug lumad taga-Liloan, Cebu.
Gibutyag ni OWWA regional director Leonor Mabagal nga kon siya’y pagbut-on supak kini nga manarbaho ang mga Pinoy sa Middle East ilabina sa Kuwait diin namatay si Hukdong niadtong Nobyembre 2017.
Suportado usab ni Mabagal ang gipatuman nga deployment ban ni Presidente Rodrigo Duterte sa Kuwait tungod sa kamatayon sa 7 ka mga Pinay worker.
Giawhag usab niini ang Pinoy workers nga kanunay aktibo sa OWWA aron kon may mga emerhensiya, gilayon kining makatabang.
Midangat ang patay’ng lawas ni Hukdong sa Pilipinas Enero 5 diin daghang internal organs niini ang nangawala.
