CAGAYAN DE ORO CITY – Gitakdang tunulan sa ayudang-pinansyal ang mga aktuwal nga pamilya o indibidiwal nga subli nasunugan sa Zone 3,Sitio Pinikitan,Brgy Camaman-an ning syudad kagabii.
Kini subay sa direktiba ni City Mayor Rolando ‘Klarex’ Uy nga nakatutok ug nasayod sa gidangatan sa halos 50 ka pamilya o dul-an 200 ka indibidwal nga nawad-an sa pinuy-anan sa maong sunog.
Gibutyag ni acting City Information Office head Jade Adecer nga gipalihok na ni Mayor Klarex ang mga personahe sa City Social and Welfare Development aron mahikay ang mga papeles nga basehan alang sa matunol nga tabang-pinansyal ubos sa city disaster quick response fund.
Siya miingon nga gawas sa mga pasiunang tabang nahatag sa city government ug bisan sa personal nga kapasidad sa pamilyang Uy, gipaniguro gihapon nga ma-dokumento ang mga biktima sa trahedya sa tuyo nga maapud ang paghatag sa tabang sa higayon nga malugwa na ang pondo alang niini.
Dumduman nga ikaduhang higayon na kini nga narespondehan sa Bureau of Fire Protection nga nasunog nga kabalayan sa miaging mga bulan.
Miingon si BFP-Nazareth investigator Fire Inspector Keith Salse nga nakaabot kanila ang teorya nga adunay nag-away nga magtiayon ug gisundan sa pagbuto sa gitoohang ‘butane’.
Apan pabiling gisuta pa imbestigador ang tinud-anay nga rason sa sunog nga mitala sa structural damage nga P300-mil.
Kasamtangang gipahimutang ni Camaman-an Punong Brgy Carl Harrison ‘Kuya Bodie’ Galarrita ang mga biktima sa sunog sa covered court sa ilang lugar sukad kagabii.
Hisayrang milugwa usab ang taho nga adunay upat ka residente nga naangol sa hitabo.
