CAGAYAN DE ORO CITY – Lig-ong pagsalig sa Ginoo ug kapas sa Israeli forces nga mapanalipdan ang kaluwasan sa kaugalingong katawhan ug mga trabahanteng langyaw ang rason kung nganong dili mohikling ang pipila ka caregivers sa pabalik Pilipinas gikan sa Israel.
Kini ang tubag sa Bombo Radyo ni Rhemy Calilim nga mag-15 ka tuig na sa pagsilbing caregiver sa Israel kung may posibilidad ba nga biyaan niya ang iyang trabaho epekto sa pagsinukliay na usab sa mga missile sa Israel ug Iran sa tunga-tungang sidlakan.
Matud ni Calilim nga dugay na kining naka-adjust sa maong sitwasyon ug nasayod na kini sa mga lakang nga angay buhaton kung sulungon na usab sa mga kaaway ang Israel gamit ang attack drones ug missiles.
Gawas niini,lisod nga mouli sa Pilipinas nga kulang ang tinigom nga kinitaan kay sayod na sila sa riyalidad nga walay ensaktong trabaho nga mahatag ang gobierno alang sa mga apektadong OFWs.
Kini ang rason nga gipalig-on pa niya ang iyang pagbati kay nalatid man sa Bibliya nga dili pasagdan sa Diyos ang pinili ug pinangga nga katawhan sa Israel batok sa bisan kinsa nga mosuway paglumpag kanila.
