CAGAYAN DE ORO CITY – Nagsagol ang gibati sa Filipino community o locals kon tawgon nga nakabase sa Pransya kabahin sa laing pagpahigayon sa sikat nga Olympics sa Paris kagabii apan kadlawon na sa Pilipinas.
Gisaysay sa Cagayan de Oro inhabitant apan nagpuyo ug nagtrabaho na sa Paris nga si Bombo International News Correspondent Charlotte Unido Fleury nga gikalipay sa pipila ka France based Pinoys nga gilusad ang Paris Olympics kay apil sila sa nakasaksi sa dala nga kapatsada ug makasuporta sa 22 ka Filipino athletes.
Siya miingon nga dili tiaw ang preparasyon sa French government ug migasto sa binilyong pondo aron mapahigayon ang pila ka semana nga Olympiada diin 154 ka nasud ang nagpadala sa sobra 10-mil 500 ka atleta aron matigi sa nagkadaiyang klase sa isports.
Namahayag usab kini nga mibati sila’g pagarbo ug patriyotismo dihang nakit-an nila ang pagparada sa delegasyon sa Pilipinas bitbit ang nasudnong-bandila sakay sa bangka nga miagi sa makasaysayanon nga Seine River sa Paris Olympics opening kagabii.
Gihinaut usab nila nga unta makahimo’g kasaysayan ang Pilipinas nga makakuha’g mga medalyang bulawan aron makadugang sa pinakaunang nasakmit ni Pinay weightlifter Hidilyn Diaz sa 2020 Tokyo Olympics sa Japan.
Wala usab matago kang Fleury ang kasikat ug respeto ngadto sa Cagayan de Oro pride nga si 2020 Tokyo Olympics boxing silver medalist Carlo Paalam nga kakuyog ni co-boxing silver medalist Neshty Petecio nga maoy naghawid sa bandila sa Pilipinas samtang nag-fluvial parade sa sobra 14-mil anyos nang Seine River.
Apan prangka usab si Charlotte nga nakahatag kahasol kanila ang hosting sa Olymdiada.
Kini tungod kay mihuot pag-ayo ang ilang seguridad diin apektado ang mga lakaw nila kay sobra ka kakuti ang mga otoridad ilabina sa Olympics venues.
Gani, daghan sa locals ang nangdayo una sa distansya nga lugar sa Pransya samtang anaa pa ang mga dula sa Olympics tungod sa kapiot sa trapiko sa palibot sa sentro niini.
Dumduman nga dunay espesyal nga kahulugan sa Pilipinas ang Paris Olympics 2024 kay nagmarka kini sa ika-100 ka tuig sukad milambigit sa labing sikat nga global sports competition.
Hisayrang sukad tuig 1924 nga pag-apil,silver ug bronze medals ang nasakmit sa ubang mga atletang Pinoy hangtod nga miabot si Diaz nga nakahimo’g kasaysayan nga nakakuha’g unang bulawan sa dula nga weightlifting sa 2020 Tokyo Olympics sa Japan.
