Patung-patong nga kaso ang atubangon sa usa ka pintor human makuha sa iyang posisyon ang ubay-ubay nga pakete sa gitoohang shabu, sulod sa iyang puy-anan sa Tibanga, Iligan City.
Sa pag-implementar sa search warrant No. 25-0141 batok sa suspek nga naila sa alyas Ruru, 41 anyos, lakip sa narekober sulod sa iyang balay ang lima ka pakete sa shabu nga adunay gimbug-aton nga 60 gramos.
Gibana-bana nga anaa sa P408,000 ang street value sa nasanta nga ilegal nga droga.
Lakip sa narekober ang mga drug paraphernalia ug usa ka kalibre 45 nga armas nga loaded sa upat ka bala. Kasong paglapas sa Sec. 11 ug 12, Article II of R.A. No. 9165 sa Comprehensive Dangerous Drugs Act of 2002; ug R.A. No. 10591 o Comprehensive Firearms and Ammunition Regulation Act ang gisang-at batok kaniya.
