CAGAYAN DE ORO CITY – Masaligon nga dugang may nakuha pang ebidensya sa kapolisan sa nahitabong pagbusikad sa balay ni mayoralty candidate George Matunog Jr sa Calamba, Misamis Occidental.
Sa exclusive interview sa Bombo Radyo kang Misamis Occidental Provincial Police Office spokesperson Lt. Charien Estenzo, siya miingon nga grenade explosion ang nabitabo ug tinuyo kining gilabay sa ganghaan nga bahin sa balay sa mayoralty candidate.
Namugos si Estenzo nga may nahuptan nga CCTV footage ang mga imbestigador apan kini labihan ka halap.
Gidepensa usab ni Estenzo ang langan nga pagresponde sa ilang roving police patrol sa pagtuo nga sama lang sa ligid sa dakung truck ang mibusikad alas 3 sa kadlawon sa milabay’ng adlaw.
Nagtinguha ang kapolisan nga madugangan pa ang magsilbing witness sa krimen aron masuta kung pila ang ihap sa mga suspek nga milabay ug granada sa balay ni Matunog.
Wala pay anggulo nga na-establishar ang mga kapolisan sa insidente apan labing duol niini mao ang pagdagan ni Matunog isip mayor sa Calamba.
