CAGAYAN DE ORO CITY – Miani sa nagkadaiyang reaksyon ang gihimong pag-resign ni Pres Bongbong Marcos ngadto sa iyang tanang sakop sa gabinete kagahapong adlawa.
Miingon si CWGG 10 convenor Atty. Antonio Soriano nga usa kini ka maayu nga hukom ni Marcos aron mapalig-on ang iyang administrasyon ug makatunol sa gilauman nga batakang serbisyo sa katawhan.
Siya miingon nga angayang hataga’g tsansa sa katawhan nga pamatud-an ni Marcos nga may malauman pa nga mga maayong serbisyo nga mahatag ang gobierno sa nasud.
Sobra ka negatibo na ang imahen sa presidente tungod sa daghang kontrobersya nga giatubang sa administrasyon niini.
Samtang katungod ni Marcos nga magbaton sa bag-ong hitsura sa mga opisyal gabinete hinungdang nga gipaluwat niya sa katungdanan ang iyang kasamtangang cabinet secreraties.
Miingon si political analyst Atty. Proculo Sarmen nga posibleng dismayado ang pangulo sa nahatag nga pagserbisyo sa maong public officials rason nga gusto niya’g kabag-uhan aron subli makuha ang pagsalig sa katawhan.
Siya miingon nga unta molampos si Marcos kung unsa man ang nakalinya nga mga plano niini sa sobra tulo ka tuig na lang nga nabilin nga pagdumala sa mga kalihukan sa nasud.
Sa pikas bahin,uUlahi na daw ang gihimong pagpabilib ni Marcos kabahin sa gihingusgan niini nga kabag-uhan sa iyang pagdumala sa nasud.
Miingon si kanhi IBP-MisOr chapter president Atty Eddie Cuaresma nga daghan na ang nadismaya sa administrasyon ug lisod na kining mahatagan sa katagbawan.
Miingon si Cuaresma nga kung gihimo kini’g sayo ni Marcos,hayan mahuptan pa niini ang dakong pagsalig sa katawhan sa nasud.
Dugang sa abogado nga nagpakita kini nga kung unsa kahuyang ang pagdumala sa administrasyon sa mga pangitabo ug pagpadagan sa kagamhanan.
