Napugos na lang sa pagguba sa ilang mga panimalay ang mga residente sa Kalambaguhan–Burgos Streets, Barangay 15, ning syudad, human nga migula na ang desisyon sa korte nga magpatuman sa demolisyon sa mga nanimuyo sa pribadong lote sa maong lugar.
Sumala ni Barangay Captain Maryfel Revano, dugay nang nasayran sa mga residente nga ipademolisyon ang maong lugar tungod kay gamiton na sa tag-iya sa yuta ang luna.
Apan matod pa ni Revano, wala gihapon dayon sila namalhin, bisan pa sa gihatag nga panahon aron makahinay-hinay og hawa gikan sa maong lugar.
Kapin kon kulang 35 ka panimalay ang hingpit nang gipapahawa sa pribadong lote, ug wala pay relocation site nga mahatag alang sa mga apektadong residente.
Butyag ni Revano, wala usab nakaandam nga pondo ang barangay alang sa pinansyal nga tabang sa mga nademolishan.
Bisan pa niini, naningkamot karon ang barangay nga mangita og pamaagi ug inisyatiba aron makahatag bisan unsang tabang sa mga residente nga nawad-an sa panimalay. (James Oliver)
