CAGAYAN DE ORO CITY –Gikompirmar ni Bureau of Customs Asst Commissioner Vincent Maronilla nga may pipila ka opisyales ug empleyado gikan sa district office nila sa Cagayan de Oro City nga gipapha ni Pres Rodrigo Duterte sa trabaho ning semanaha.
Kini human ipatawag ang maong Customs officials nga dunay isyu sa kurapsyon sa Malakanyang diin gipang-sermonan sila’g maayo ni Duterte.
Miingon si Maronilla nga itugyan na lamang nila sa presidente ang mahimong kapalaparan sa ilang mga kaubang trabahante nga sentro sa pasangil sa pagpangawkaw.
Anaa sa 64 ka Customs employees ang dungan gipangtangtang sa trabaho gumikan sa mga report nga nakaabot kang Duterte nga sila nalambigit sa kurapsyon.
Samtang ipaubos sa pagka-suspenso ang 64 ka empleyado sa BoC nga unang gipangtangtanga’g trabaho ni Pres Rodrigo Duterte.
Kini samtang dunggon ang ilang mga kaso sa Ombudsman gumikan sa pasangil sa kurapsyon.
Gibutyag ni Presidential spokesperson Salvador Panelo nga tahasan nila ang prosecutors sa Ombudsman sa pagpadali sa pagdungog sa mga kaso batok sa mga gipangpapha ni Duterte sa trabaho.
Una nang gipapili ni Duterte nga mo-resign o mo-atubang na lamang sa kaso ang maong mga empleyado gumikan sa ilang nahimo nga kasaypanan.
