CAGAYAN DE ORO CITY – Gibulgar ni committee on economic enterprise chairman ABC Federation Pres. Kag. Alam Lim ang dakong sindikato sa pagpangilkil sa pipila ka empleyado sa city hall nga nakabase sa mga merkadong publiko sa dakbayan.
Nabuking kini human mibutho ang audit observation memorandum sa Commission on Audit nga gihimua’g special report ni Kag. Jose Pepe Abbu Jr sa konseho nga daghang descrepancies ang nadiskobrehan sa pagdumala sa mga merkado.
Miingon si Lim nga hawid na niini ang mga pangalan sa pipila ka city hall employees nga daw nagpalimos sa market vendors aron dunay bahin-bahinon nga kinilkil matag-semana.
Hisayrang sa special report ni Abbu,gilakbitan niini nga anaa sa 124 milyones pesos ang pakyas ma-kolekta nga kinitaan gikan sa market stall rentals sa nagkadaiyang merkado sa syudad sa dugay nang katuigan.
