CAGAYAN DE ORO CITY-Gisupak sa pipila ka internally displaced persons o IDPs ang tinguha ni Pres Rodrigo Duterte nga paglugway sa martial law sa Mindanao.
Gipabati kini sa bakwit nga si Apotre Dagarana tungod kay gusto na nila makabalik sa Marawi City gikan sa ilang gipasilungan nga evacuation center sa Iligan City.
Naghanyo usab sila kang Duterte nga unta mapadali na ang pagpuhag sa mga terorista aron mabalikan na nila ang ilang mga pinuy-anan nga nabiyaan sa dul-ag duha na ka bulan.
Una nang gibutyag Dagarana nga walay bisan usa ka kristiyano nga nakasagol sa ilang pundok ang na-hostage sa mga terorista.
Samtang gitunol sa provincial govt gikan sa Zamboanga del Norte ang unom ka dumptrucks nga relief goods sa libuang mga bakwit nga nahimutang sa nagkadaiyang evacuation centers sa Marawi City ug Lanao provines.
Kini human nakaabot ang ayuda nga gipadala ni Zamboanga del Norte Gov Robert Uy alang sa evacuees sa Marawi City kagahapong adlawa.
Namahayag ang executive assistant ni Uy nga si Praxedes Rubia nga wala nila igsapayan ang peligro sa kinabuhi,makatabang lamang sa mga bakwit nga nag-antos sa kagutom ning panahona.
Sa pikas bahin,gihangyo karon ni Lanao del Sur PSWD officer Maharlanny Alonto ang militar nga ablihan ug tugtan sila makasulod sa access roads padulong sa lokasyon sa mga nalukong nga mga residente sa Marawi City.
Kini aron makaabot ang mga ayuda ug matunol sa mga bakwit ang nagkadaiyang tabang ilabina ang gikan sa Zamboanga del Norte.
Gani,dili tiaw ang sakripisyo sa nagpaabot-tabang nga nga grupo diin gisugal nila ang ilang mga kinabuhi batok sa armadong pundok makaabot lamang sa war zone.
Una niini,kumpirmado nga nakaabot na ang tabang sa international community partikular gikan sa Arab nations alang sa kapin 200-mil ka residente nga apektado sa kagubot.
