CAGAYAN DE ORO CITY-Pila ka adlaw sa dili pa ang filing sa ‘certificate of candidacy’, nagkainit na ang mga kandidato nga gustong magpapili sa Barangay Nazareth ning syudad.
Maoy nakapainit sa umalabot election ang laraw sa kapikas ni City Councilor Mark Ian Nacaya nga si Reyna Nacaya nga magpapili pagka-kapitan kontra sa anak ni 2nd District Maximo Rodriguez nga si Jan-jan Rodriguez.
Atol sa “Isyu sa Barangay” nga programa sa Bombo Radyo, gitin-aw ni Nacaya nga mismo ang mga residente sa Nazareth ang nag-awhag sa iyang kapikas nga magpapili aron mobalik ang kabibo sa maong lugar butang nga gikasuko ni incumbent Nazareth Barangay Kapitan Bebot Rodriguez.
Gitawag ni Rodriguez si City Councilor Nacaya nga ‘disoriented’.
Kini ang tubag sa opisyal nunot na sa akusasyon ni Nacaya nga nawala na ang ka-bibo sa Barangay Nazareth.
Gani, gikataw-an lamang ni Rodriguez ang akusasyon ni Nacaya dungan sa pag-ingon nga walay katungod si Nacaya nga tawagon nga mingaw ang iyang area of responsibility tungod kay dili na siya residente sa Barangay Nazareth.
Sya miingon nga dugay na nga gibiyaan ug gipasagdan ni Nacaya ang iyang mga supporters tungod kay sa Barangay Macasandig na siya nga nagpuyo-ay.
