CAGAYAN DE ORO CITY – Gitawag ni Cagayan de Oro 2nd district Rep Rufus Rodriguez nga fake news ang report nga laraw palagpoton sa puwesto si House Speaker Alan Peter Cayetano.
Kini may kalabutan sa isyu sa national budget ug walay aksyon sa kamarabaha sa franchise renewal sa ABS-CBN.
Giangkon ni Rodriguez nga dismayado siya tungod kay walay hearing nga gihimo ang kamarabaha sa franchise renewal sa maong TV network apan gitin-aw niini nga walay kamatooran ang akusasyon ni Cayetano nga gipangulohan ni Marinduque Rep. Lord Allan Velasco ang ouster plot batok kaniya.
Gipanghimakak usab niini ang alegasyon nga adunay gidoolan nga mga kongresista si Velasco ug gipangsaaran sa budget allocation ug committee chairmanships.
Samtang gipasalig ni Iligan City Lone Dist. Rep. Frederick Siao nga magpabilin ang iyang loyalty ngadto kang Cayetano.
Kini kun ugaling tinood ang report nga adunay naglaraw nga palagpoton si Cayetano sa iyang pwesto.
Apan gitin-aw ni Siao nga wala siya’y nadawatan nga taho nga may iyang kaubang mga kongresista nga nagplano nga hulipan ang House leadership.
Gani, gipanganti ni Siao nga iyang sundon ang nasabutan nga 15-21 Magellan formula sa kamarabaha.
Samtang nagtoo si Bukidnon 4th District Rep Rogelio Neil Roque nga tuyo lamang ipag-away sila si Cayetano ug Velasco sa ilang mga kontra sulod sa kamarabaha.
Kini samtang una nang magkaribal si Cayetano ug Velasco sa pagka-speaker ayha naporma ang term sharing sa maong katungdanan.
Namahayag si Roque nga wala siya’y nakita nga abuso apan patas ang pagdala ni Cayetano ngadto kanila sukad natahasan nga panguluhan ang Kamarabaha.
Si Cayetano ug Roque ang pulos miembro sa partido Nationalista nga nakig-alyas sa ruling PDP-Laban party ni Duterte.
