Walay plano muuli sa Pilipinas ang OFW sa Qatar nga si Josephine Orasan bisan pa sa posibleng hulga sa iyang kinabuhi tungod sa nagpadayon nga tensyon tali sa Estados Unidos, Israel ug Iran nga nakaapekto sa lain-laing bahin sa Middle East.
Sa interbyu sa Bombo Radyo, miingon si Orasan nga muuli lamang siya kon adunay opisyal nga abiso gikan sa gobyerno sa Qatar nga dili na luwas alang sa mga sibilyan ang magpabilin sa maong nasud.Apan kung siya pay pabut-on, andam siyang mupapauli sa Pilipinas kon klaro na nga delikado na gayud ang kahimtang ug biyaan ang iyang kinabuhi isip OFW sulod sa walo ka tuig.
Matud pa niya, alang sa iyang mga mahal sa kinabuhi sa Pilipinas, mas pilion niya ang kaluwasan kaysa magpabilin sa lugar nga puno sa kagubot.
Sa laing bahin, gipatin-aw ni Orasan nga wala kaayo maapektohi ang Qatar kumpara sa ubang rehiyon sa Middle East, ug gipasiguro usab sa ilang gobyerno nga walay sibilyan nga maapektohan sa tensyon.
Dugang pa niya, ang mga target lamang sa mga pag-atake mao ang mga base militar sa Estados Unidos nga anaa sa maong rehiyon. (James Oliver)
