CAGAYAN DE ORO CITY – Nakasuhan na sa double murder ug frustrated murder ang pipila ka politiko ug uban pang personalidad nga suspek pag-ambush patay sa magtiayon nga sila Lumbaca Unayan Mayor Somerado Guro ug kapikas nga si Rohaifa Guro sa Brgy Iponan sa syudad.
Kini human tumbuka sa pamilyang Guro ang pipila ka elected officials nga giingong mihimo sa kremin niadtong Hunyo 3 ning tuiga.
Miingon si City Director Col Henry Dampal nga napasaka nila ang kaso tungod sa kooperasyon sa pamilya samtang mihimo sa lapad nga imbestigasyon ang SITG-Guro sa hitabo.
Gikompirmar na usab ni Dampal nga politika ang labing duol nga anggulo kon nganong gi-ambush ang magtiayong Guro samtang sakay sa sakyanan pauli unta sa Lanao del Sur sa miaging bulan.
Samtang gikonsiderar na ni Dampal nga ‘case cleared’ na ang pag-ambush kang Lumbaca Unayan Mayor Somerado Guro sa Brgy Iponan ning syudad.
Kini human natumbok na ang mga suspek sa kremin ug nakasuhan sa piskalya ning dakbayan.
Miiingon si City Police Director Col Dampal nga may gihimo pa sila nga dugang pakisusi aron ipuno sa mga ebedensiya sa duha ka kaso batok sa mga mihimo sa kremin.
Nagdumili una ang opisyal pagtumbok sa pangalan sa mga suspek samtang wala pa nalugwa ang warrant of arrest batok kanila.
Dugtong niini,puno sa paglaum ang pamilyang Guro nga mahatagan sa dinalian nga pagkasulbad ang kamatayon ni Mayor Somerado ug Rohaifa Guro nga gipangbanhigan sa duha ka suspek ning syudad.
Namahayag ang igsoon ni Somerado nga si Omira Guro nga gitugyan na lamang nila kang ‘Allah’ ang ilang pakigbisog aron mahatag ang kaangayan sa nahitabo sa mga biktima.
Miingon si Guro nga gipatay ang iyang igsoon tungod kay dunay nag-interes nga mopuli sa nahuptang posisyon niini.
