CAGAYAN DE ORO CITY-Nabahin ang reaksyon sa mga residente sa Brgy Balulang sa laraw ni Pres Rodrigo Duterte nga pasirad-an ang tanang minahan lakip na ang quarry sites.
Sumala sa jeepney driver nga si Nestor Booc, daghan ang mawad-an sa panginabuhian kung pasirad-an ang mga quarry.
Samtang gibutyag usab ni alyas Dodoy nga kinahanglang pasirad-an na ang mga quarry aron dili mahitabo sa dakbayan ang mga landslide nga natigayon sa Luzon ug Visayas nga gikamatay sa ubay-ubay ka mga residente.
Gitin-aw usab ni City Local Environment and Natural Resources o CLENRO head Engr Armen Cuenca nga dili delikado sa kaluwasan sa mga residente ang quarry nga gihatagan sa permit sa dakbayan.
Siya miingon nga maoy giaprobahan nga permit sa ilang ahensiya ang ‘sand and gravel’ nga makuha sa suba ug dili kini moresulta sa gikahadlukan nga landslide.
Miingon si Cuenca nga dili basta-basta nga ilang mapahunong ang quarry operators nga nagbaton sa permit.
Dugtong ni Cuenca nga maoy ilang pokus nga mabantayan ang mga kalihukan sa operators sa pagseguro kon nakasunod ba sila sa insaktong gabayan ilabina kung basehan ang ilang nakuhang permit.
Kun ugaling masupak sa mga operators ang balaod, dili siya magpanuko nga pasirad-an kini.
