CAGAYAN DE ORO CITY-Gisupak sa nagkadaiyang sektor ang plano sa gobyerno nga bag-ohon ang 1987 Philippine Constitution atol sa gipahigayon nga Mindanao leg sa regional consultative hearing nga gipasiugdahan sa komite sa senado sa Xavier-Ateneo Sports Center, El Camino Real Avenue, Pueblo de Oro ning syudad.
Si Atty Eddie Cuaresma, presidente sa Integrated Bar of the Philippines-Misamis Oriental miingon nga pabor sila nga bag-ohon ang konstitusyon ug himoong pederal ang sistema sa gobyerno apan kinahanglang magpabilin ang bill of rights, social justice ug environment provisions.
Gibutyag usab ni Atty Ernesto Neri sa Oro Youth Development Council nga gusto nila ang ChaCha.
Apan dili kini ang insaktong panahon tungod kay kinahanglang tun-an sa gobyerno ang problema sa nasud.
Una niini, gipanguluhan ni Senate committee on Constitutional Amendments and Revision of Codes Senator Francis “Kiko” Pangilinan ang paghimo’g mga pagdungog kalabot na sa Cha-Cha.
Samtang bisan si Citizens Watch and Good Governance o CWGG convenor Atty Antonio Soriano ang supak nga bag-uhon ang 1987 Constitution.
Gibutyag ni Soriano nga maoy iyang gusto nga buhaton sa 1987 Constitution mao ang pag-amendar sa pipila ka balaod.
Giangkon ni Soriano nga may mga balaod siya nga gusto usbon diin usa na niini ang may kalabutan sa balaod sa piliay.
Gisugyot ni Soriano nga mas maayo nga ang presidente sa nasud maoy magpili kon kinsa ang iyang bise-presidente aron walay samok.
